السحر القاتل – الحلقة 15

22 أكتوبر 2017آخر تحديث : منذ سنتين
السحر القاتل – الحلقة 15
طارق اللبيب

مرت كم يوم كدا .. والاتصالات والمكالمات بين سهام وبين ميادة ومن ميادة لي صلاح . والشي الواضح وماداير نقاش انو سهام بقت كل يوم تزداد غرق في ريدة عوض . وكل المكالمات البينها وبين ميادة بتكلمو عنو .. يوم قالت ليها انتي عارفة ياميادة . انا حاسة باني بدفق مويتي على الرهاب .. عوض ده قبل كدا امي سألتو .. وقال ليها ماعايزها ..

قالت ليها الوكت داك هو ما كان اتاكد من شخصيتك . لكن هسي هو عرفك كويس.. وبمجرد ماحباك ظهرت قصة هجليج .. غايتو جنس حاجات ياسهام ..

قالت ليها ياميادة انا الزول الاسمو محمد ده اصلا ما دخل راسي . حتى قبل ما اتعلق بي عوض كدا .. ياخي انا شفتو صغيرة وهو كان كبير .. وهسي ماكلف نفسو يتصل علي ناس البيت ولاعلي .. بس ماعارفة ارفضو كيف .. انا بحب عمتي شديد وعمتي بتحبني .. انا لو رفضت ولدها .. تعالي شوفي المشاكل البتحصل .. وح تقول دي امها لعبت في راسها .. وعلاقتها بي ابوي حتبوظ .. والله ماعارفة ذاتو.. بس هسي ماسكة ليهم في دايرة اقرا دايرة اقرا ..

وشكلي بي مستواي الدراسي ده من تالتة وتاني خلاص . ..

ولو رفضتو هو ح اقفل الطريق قدام عوض.. والاتنين ح يطيروا .. واااي انا ماعارفة اسوي شنو . يا ميادة انا عايزة عوض يعني اكورك ولا اعمل شنو؟

قالت ليها ان شاء الله ياسهام .. ان شاء الله بس انتي امسكي لي في قصة دايرة اقرا دي ..

انا من وقتي الفي الخرطوم .. قلت ليك ح اعمل المستحيل عشان اوفق بينكم.. ولاهسي مابقيف .. اها بعد الكلام ده بالمساء ..

كدا صلاح مشى لي ناس ميادة في البيت.. لانو ميادة يوم الاحد حتنزل المدرسة خلاص . حمدلله على السلامة ..

اها يازول ناس ميادة ديل بحبو صلاح ده حب عجيب .. ويومو اليجيهم في البيت.. البيت ده كلو بفرح .. امها مابتقول ليهو الا يا صباح الخير . وهو فعلا صباح خير .. ومن يجيهم امها بتخليهم يتكلمو بي راحتهم .. وهم ياحليلهم ونستهم كلها عن عوض وسهام .. بس الحكاية دي قربتهم لي بعض اكتر .. ميادة كل يوم بتتاكد انو صلاح انسان قيم وراقي .. وبحس بي الام الاخرين .. وصلاح بحس نفس الاحساس من ميادة ..

اصلا ياجماعة الزول الفيهو صفة حميدة .. مابتكلم بيها ويعمل ليها اعلان .. هي براها بتظهر للناس وتتحس .. يعني الزول يقول انا طيب وانا كريم وانا حنين وانا وانا .. الكلام ده مابشكل فرق في قلوب الناس .. الانجاز الحقيقي انو الناس يشوفو صفاتك على ارض الواقع هم براهم بصفوك بيها ..

اها صلاح قال لي ميادة والله ياميادة انا فرحان ليك فرح انك ملكتي الصحة .. واكتر شي فرحان لي نفسي .. انو اغلى زول في الدنيا بالنسبة لي بقى كويس واتعافا ..

قالت ليهو ده بي فضل الله .. ثم فضلك وعوض ود المهدية ههه

قال ليها دايما دايما .تتكلمي عن عوض .. قالت ليهو بتكلم بتكلم .. انت مالك ؟ ههه .. قال ليها خلاص خلاص .. ما تنفعلي وترفعي صوتك امك تقول بتشاكلو .. طبعا كلو مزاح وهظار جميل ..

قال ليها والله يا ميادة انا حزين.. انو عوض وسهام ماحيكونو لي بعض .. قالت ليهو انا موش حكيت ليك بالتلفون وقلت ليك سهام وقعت وقعة الماسمى ..

قال ليها فعلا ياميادة.. لكن المشكلة عوض ماعارف انها وقعت في حبو .. ومحمد ماعندها ليهو اي شي ..

قالت ليهو طيب .. انت المفروض تكلمو ولاشنو؟.. تقول ليهو الزولة بتريدك انت.. وما حتقدر تعيش مع اخوك ..

صلاح قاليها بلاااااااي؟؟ .. انتي مابتعرفي عوض .. والله احتمال الكلام ده يخرب علاقتي معاهو .. لانو بشوف اخوهو ده زي الملاك .. ومستحيل عوض يفكر ادنى تفكير.. في زولة اخوهو محمد قال عايزها.. ده عوض صاحبي وانا اكتر زول بعرفو ..

قالت ليهو طيب الحل شنو.. ؟ نحن المفروض مانكون قاعدين مكتفين كدا ياصلاح .. قال ليها انتي ماتشيلي هم .. الشي الانا بقدر عليهو بعملو ان شاء الله ..

وبحاول احلو بي طريقة.. عوض مايكون عندو فيها اي علم .. بس انتي متأكدة انو سهام ماح تستعجل وتبوظ المواضيع ؟ قالت ليهو لالا .. لاني متأكدة انها ماسكة في قصة (دايرة اكمل قرايتي).. !!

قال ليهو الحنك المشهور ههه .. اها نحن ياميادة موضوعنا انا وانتي خبرو شنو.. انا طبعا جاهز بس رايك تديني اشارة .. فعلا صلاح جاهز.. لانو ظروفه المادية فل .. عندو قطعة فاضية في مدني.. في شارع رئيسي وفيها اربعة دكاكين مأجرة . وعندو دكان شغال فيهو ود اهلو .. بتاع اجهزة كهربائية.. يعني امورو باسطة .. مازي العوض الفلسان .. قدرة فول ماقادر يسويها .. وابوهو ذاتو من اليوم داك تاني ما اداهو اي خبر نافع ..

لكن الخير عند الله.. وربنا قادر على تدبير الامور.. المهم الزول يكون ثقتو بالله كبيرة ..

وصلاح ده قدر ماقعد يفكر .. كلو كلو مالقى طريقة يلم بيها المواضيع ..

المهم يوم مشى لي السر في السوق .. فطر عندو واتعرف عليهو .. وحكى ليهو قصة صحبتو مع عوض .. وكيف انو عوض كان سبب في علاج خطيبتو .. ووقفتو معاهم في الخرطوم وانو قعد معاهو في البيت اسبوعين وشوية .. طبعا” ماكلمو باي شي بخص سهام .. ولا جاب ليهو سيرة .. شكلو داير يعمل تعارف بس .. السر قال ليهو والله عوض راجل اصيل ياخي ..

قال ليهو طبعا الزول ده قال لي بحب مدني شديد .. انت رايك شنو.. نقوم نعمل ليهو شغل هنا في البلد دي.. اصلا خبرتو في الفولة دي بقت كبيرة ..

قال ليهو والله يكون كويس .. انا شخصيا ماعندي اي مانع.. انت شوف المحل .. ونمسكو ليهو ونرسل ليهو يجي مالو؟؟ .. انا والله عوض بحتاج ليهو كتير.. لاني ماعندي ولد كبير .. والله وكت كان معاي هنا.. كان ماسك الامور كلها ولاحسيت اني محتاج لي زول تاني ..

قال ليهو يازول على خيرة الله .. مافي عوجة تب ..

انا عارف لي محل موقعو سمح شديد.. بس الزول الفيهو لسع ماطلع.. وقال بطلع بعد شهر ونص.. نكلمو يتصبر وبعد شهر ونص يجي رايك شنو؟

السر قال ليهو وانا مني المسلتزمات من طربيزة وقدرة ومواعين وغيرو ..

صلاح قال ليهو كدا الامور ظبطت .. تسلم ياخال .. والله فعلا انت خال عوض تبارك الله .. وودعو وفات منو ..

قام صلاح بالعصرية كدا اتصل على عوض .. قال ليهو ياعوض انت كيف.. ولقيت شغل ولا مالقيت؟ .. قال ليهو والله لسع الوالد كل ما أسالو بقول لي محل بنفع معاك مافي اصبر .. قربت اشد لي قدرة قدام البيت هههه

صلاح قال ليهو ابشر ياعوض.. انا عندي ليك بشارة قوية .. اولا قبيل انا كنت مع خالك.. مشيت اتعرفت عليهو وسلمت عليهو وكدا .. واتكلمنا عنك واتفقنا على انك تجي مدني .. وخالك قال قال .. وانا بمسك ليك الدكان لامن تجي.. وبدفع ليك حق الشهر الاول .. بعد تشتغل ترجع لي قروشي ..

قال ليهو ياخي والله تسلم انت ويسلم خالي .. مافي مشكلة انا بنتظر .. ومدني مادام فيها انت .. انا عندي فيها ركازة قبيلة..

وكدا عوض من ناحية الشغل امورو وضحت شديد ..

سبحان الله بالله شوف الخوة الصافية دي .. والله ياصلاح ودحمد .. حقو الناس يجو يتعلمو منكم الخوة انت وعوض .. ياخي عقدتونا عديل ..

ومرة قال طارق اللبيب ..

البختار صحاب عظما وكرام واجلا.

مابخاف الضلام مادام معاهو اهله.

الاخوان كتاااار .لكين تضايقك عله.

تلقى الشله غابت والبساندو اقله.

.اخوك البسندك في يومك التحتاجو.

يفتح بابو ليكا وليك يضوي سراجو.

في النايبات يجيك بي شلتو وافواجو.

زي بحر المحيط ما بتنقدر امواجو.

وفعلا كما قال.. ده كان حال صلاح مع عوض.. وعوض مع صلاح .. اها يازول بتكلم معاهو كدا قال ليهو كيف حال خافظ ياعوض ؟

قال ليهو والله حارق بي نفس.. الحمد لله في امن وامان .. تاني اصلو ماجاب سيرة المخابرات الامريكية .. وكت نتذكرها ليهو بقعد يضحك ..

قال ليهو عليك الله تديني تلفونو .. داير اسلم عليهو .. قال ليهو جدا اكتب عندك وملاهو الرقم ..

المهم بعد قفل منو الخط.. صلاح ضرب لي حافظ وسلم عليهو.. وحافظ فرح جدا انو صلاح صاحب عوض بسأل منو ومن صحتو ..

قام قال ليهو يا حافظ .. ياخي انا داير منك خدمة .. اول مرة اطلب منك ياريت ماتخذلني ياخ ..

حافظ قال ليهو افو.. والله لو بي دمي اقضيها ليك .. بس انت قول وتاني ماتشيل هم ..

قال ليهو انت هسي وين ؟ قال ليهو انا هسي ماشي على البيت جاي من الجامعة .. قال ليهو خلاص دايرك بالمساء كدا تكون براك وتدديني رنة .. وماتقول حاجة عن اتصالي ده لي عوض اصلا.. بعدين بحكي ليك ليه ..

قال ليهو جدا ياصلاح ابشر .. ..

صلاح كان عندو فكرة .. وهي الاخيرة بالنسبة ليهو في انقاذ حب سهام وعوض .. الاصلا ميئوس منه.. من كل الاتجاهات ..

المهم يازول بالمساء كدا .. اتصل حافظ على صلاح .. وصلاح قفل منو الخط ورجع ليهو ..

قال ليهو ليه ياصلاح انا عندي رصيد .. قال ليهو ما اشكال ياحافظ .. انا عايز اتكلم معاك كلام مطول .. بس انت تخلي لي بالك كويس ..

انت راجل فاهم واخو اخوان .. بس قبل ما اتكلم ارجو انو يكون الكلام سر بيني وبينك .. لغاية ماننفذ المهمة .. خاصة من عوض.. مايعرف اي حاجة.. لانو لو عرف موضوعنا كلو ببوظ ..

قال ليهو يا صلاح قول والله وترتني في شنو؟

قال ليهو شيل الصبر ..

اول حاجة انت عارف انو امك خطبت سهام بت خالك لي محمد اخوك ؟؟ قال ليهو ايوة كلمتني ..

قال ليهو حلو .. خلي بالك معاي.. اول حاجة عوض اخوك كان بحب سهام اكتر من روحو ..

وسهام برضو نفس الشي .. ويومو الكان جاي يفاتح امو في الموضوع .. امه فاجأته بي انها طلبت سهام لمحمد ..

طوالي عوض اخوك سكت .. واتنازل وكتم الموضوع في قلبو.. وتاني مافتح خشمو .. عشان هو بحترم اخوهو وبحبو وماعايز يفقدو .

والحكاية دي كدا غلط يا حافظ انت معاي ؟؟

قال ليهو ايوة غلط.. وخطرة جدا .. يعني كيف يكون قاعد في البيت.. ومرة اخوهو هي حبيبتو الاولى ..

قال ليهو والله على حسب علمي .. انو عوض اتنازل عنها تماما.. يعني تاني ماحيفكر فيها الا انها بت خالو ومراة اخوه ..

لكن انا بقول.. نحن لو ضمنا عوض .. كيف نقدر نضمن سهام وانت عارف النساء عاطفيات .. وانا خايف الحكاية بعدين تجيب مشاكل .. لو محمد اكتشف انو عوض وسهام كانو بحبو بعض ..

حافظ قال ليهو طيب .. انا متأكد انو عوض تاني ما ح يغير رايو.. وما حيقبل على سهام مهما كانت ..

قال ليهو والله يا حافظ انا ذاتي متأكد من كدا .. بس على الاقل

لو مابقت من نصيب عوض .. محمد مايتزوجها .. ده غايتو راي انا .. وانا عايزك تفكر معاي .. وانا عارف دي مهمة صعبة بس انت قدرها ..

قال ليهو طيب ياصلاح انا عندي فكرة .. احتمال كبير تنجح

قال ليهو طيب قول انا معاك ..

اللى اللقاء

رابط مختصر

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *


شروط التعليق :

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.