السحر القاتل – الحلقة 14

22 أكتوبر 2017آخر تحديث : منذ سنتين
السحر القاتل – الحلقة 14
طارق اللبيب

طبعا عوض اتفاجأ بالسؤال . .. وبقى ماعارف يقول ليهو شنو .. وبي حركة كدا بتاعة تهرب .. بقى يسوي ليهو.. الو .. الو.. الوي ياخال .. يعني حنك بتاع الشبكة .. والصوت بقطع وكدا .. وداس على زر قطع الاتصال .. وتيت تيت تيت .. وبقى ماسك التلفون بي يد .. وبحك في راسو بي يد .. وشكلو مربوك ربكة عجيبة.. ويقول ده هسي اقول ليهو شنو؟.. هسي حيضرب تاني ..

انا لو قلت الحقيقة .. بتحصل مشاكل لا ليها اول ولا ليها اخر .. خالي حيتاثر شديد .. وهي اساسا البت ماعندها غلط .. وربما محمد يسمع بي المشكلة ومايتفهم .. ويقوم يسيبها .. لالا ..

هو في تفكيرو وارتباكو ده خالو اتصل عليهو تاني .. قال ليهو يا عوض .. الظاهر الشبكة ماكويسة .. ماقلت لي السبب شنو؟ الخلاك تشك فيها وتتابعها ..

قال ليهو لو في اي سبب خطر.. انا ماكان دسيتو عليك .. وانا والله بعد متابعتي لسهام .. وسؤالي عنها لقيتها اشرف واحسن بت .. والله سهام تستحق انك تفتخر بيها ياخال ..

بعدين زولة ح تبقى مرة اخوي ..انا لازم اسأل منها واتاكد.. ولا شنو ياخال ؟ هههه واخد ليهو ضحكة ..

قال ليهو والله كلامك صاح.. مافي مشكلة خلاص يا عوض.. ربنا يديك العافية ..

المهم كان اقناع السر بالموضوع اكتر من ساهل ..

والكلام لغاية هنا انتهى ..

عوض رجع يرجف للجماعة القاعدين في الرحلة ..وطبعا طيلة المكالمة ..صلاح براقب فيهو

وفي تعابير وشو .. ولمن قطع الخط .. والحالة الحصلت عليه ومعاودة الاتصال .. وكلللو صلاح متابعو حتى الجماعة القاعدين حسو بمتابعة صلاح لي تلفون عوض ..

قال ليهو ان شاء الله مافي مشكلة ؟ عوض مالو ياصلاح؟ .. قال ليهم سوء تفاهم بينو وبين صاحبو في مدني ..

انتهت الرحلة ..وصلاح وصلتو البيت سأل عوض من الاتصال وعوض حكا ليهو .. صلاح قال ليهو والله خيرا مافعلت .. وصلاح طبعا” حيسافر بكرة يلا يا ابو الصلح نلاقيك في مدني ..

اما الحاصل في مدني كالاتي ..

المساء كدا بعد مكالمة عوض والسر بعدة ساعات .. السر .. نادى بتو سهام ..قال ليها ياسهام تعالي .. قلبها دقدقدقدق .. وكت جاتو اهلين ابوي ..

قال ليها تعالي اقعدي هنا عندي معاك كلام .. عاينت لي وشو لقتو وشو مافيهو اي تعابير لاخير ولاشر .. اها ياربي ابوي ده مالو لازم يكون اتصل بي عوض المغفل.. وعوض فتاني لييهو …

قال ليها انا اتصلت على عوض .. وأعتذرت ليهو وذليت روحي .لكن الحمد لله .. طبعا” الغلط غلطي انا.. لاغلطك ولاغلط امك ..

المهم الولد جزاهو الله خير .. لقيتو مازعلان مني نهائي ..بالعكس قابلني احسن مقابلة .. والله يستاهل اسم ابوي ..

وانا طبعا سألتو والحيت عليهو ..

قلت ليهو السبب الخلاك تراقب البت دي شنو ؟وشفت عليها شنو؟ سهام بعد قلبها ماكان بقول دقدقدقدق .. عمل فررررر (هههه ماقلتي مصلحة اجتماعية) ؟؟..

عوض قال لي ماشفت عليها الا الخير .. وقال لي لو في اي سبب خطر.. انا ماكان دسيتو عليك .. وقال لي انا والله بعد متابعتي لسهام .. وسؤالي عنها لقيتها اشرف واحسن بت .. والله سهام تستحق انك تفتخر بيها ياخال ..

حتى الحمد لله انا قلبي ياسهام اطئن ..وثقتي فيك ماخابت.. الحمد لله ..

سهام بي قلبها قالت اححي ياقلبي .. والله حسيت اني بموت عديل .. تسلم ياعوض ود عمتي .. الله يحفظك يا الغالي .. ده كلو في سرها ..

ابوها قال ليها في موضوع تاني ياسهام .. عايز استشيرك فيهو.. وتديني فيهو رايك بي راحتك.. يعني ماشرط تديني اجابتك هسي .. على راحتك تفكري وتديني النتيجة ..

قالت ليهو لالا قول لي هسي انا ماعندي تفكير في كلام تقولو انت ..بنفذ بدون تفكير .. قال ليها طيب .. عمتك مهدية ام عوض.. اتصلت علي وقالت لي عايزة بتك سهام لي ولدي محمد ..

قالت ليهو محمد؟؟.. قال ليها ايوة محمد. ..الشغال في هجليج .. قالت ليهو بس يا ابوي ده طول انا مالاقيتو ..ومابعرف عنو اي حاجة .. بعدين انا عندي رغبة اواصل دراستي .. بعدين الزول ده حيسكني في الخرطوم ..واكون بعيدة من امي ..وانا ساسا الخرطوم دي بكرها موت ..

قال ليها المهم انتي ماتناقشيني كتير ..اخدي راحتك في التفكير وبعدين ارجعي لي بي راي.. مافيهو اي تردد ..

المهم رجعت منو ..وبقت تفكر .. في موضوع واحد .. نهائي مافكرت في عرض ابوها بتاع محمد الفي هجليج ..

بس تتكلم براها وتتبسم ..ياسلام عليك ياعوض .. والله انا كنت خايفة خوف .. والله ياعوض طلعت زول اصيل .. الله يديك العافية .. والله عوض ده شكلي فاهماهو غلط ..

وبقت تدخل وتمرق وتتبسم .. طوالي شالت التلفون واتصلت علي ميادة .. لقت ميادة رقمها مشغول .. وبقت تدق وتدق.. لامن فتحت ليها الخط .. قالت ليها والله يا ميادة يادوب وقع لي كلامك.. انتي وكتك كلو تشكري في عوض.. وانا مامهتمة بي كلامك .. وبقول لانو وقف معاها … لكن الليلة عوض اثبت لي انو زول من طراز نادر ياهناية .. ٌ

قالت ليها كيف؟ .. احكي لي والله الليلة دي بشارة قوية عديل ..

قالت ليها تتخيلي ياميادة .. قدر ما ابوي ضغطو والح عليهو يوريهو .. ابا كلو كلو يوريهو .. وقال عني جنس جنس كلام انا لامن فرحت يشيل ويشكر فيني لي ابوي ..

بس في حاجة محيراني ياميادة .. الزول ده شكلو صادق وماممكن يدس ويكذب .. الخلاهو يدس على ابوي انو لاقاني في السوق قاعدة مع بكري شنو؟

قالت ليها بس عايز يسترك .. قالت ليها يسترني فوق الغلط ؟

قالت ليها ياخي ما تجننيني .. اتصلي عليهو براك اسأليهو .. اصلا هو بحبك ..

قالت ليها انتي ماشفتي اللخبطة وين .. عارفة عمتي مهدية ام عوض .. اتصلت علي ابوي عشان تخطبني لولدها الكبير .. شغال في هجليج واكبر مني بي 13 سنة ..

ميادة قالت ليها اوووب علينا.. ده كمان نط من وين ده .. هسي انا بحاول الملم فيكم انتي وعوض.. ينط لي زول من هجليج ..؟؟ قالت ليها والله انا ماعارفة ياميادة لكن الليلة حاسة باحاسيس غريبة بعد كلام ابوي عن عوض ..

قالت ليها يازولة اذاكان ربنا اراد يلمكم بلمكم .. دي حكاية عند الله ..

انتي تلفون عوض عندك ياسهام ؟.. قالت ليها ابدا مامعاي بس ليه ؟ قالت ليها انا عايزاك تتصلي عليهو.. وتسأليهو السؤال ده .. تقول ليهو انت كذبت على ابوي ليه؟ ودسيت عليهو حكاية لقيتني في السوق؟ ..

قالت ليها مامشكلة تلفونو بطلعو من تلفون ابوي .. اصلا ابوي دايما بنسى تلفونو وبطلع ولافيهو رمز ولاحاجة..

قالت ليهو حلو بس عليك الله بعد تتصلي عليهو ارجعي لي وريني عملتي شنو؟ قالت ليها حااااااااااضر حبيبتي .. انت صحتك كيف ؟؟

قالت ليها والله زي الفل .. وماعندي اي عوجة .. بس ياهو شوية الارهاق من طول فترة المرض .. يعني كلها كم يوم وبرجع مدرستي ان شاء الله ونتلاقا هناك ..

قالت ليها والله ياميادة الدرسة من دونك مسيخة وقبيحة .. خليتيني للموهمات ديل.. ناس نازك ومودة وسحر .. ماعندهن شغلة غير داك سمح وداك شياكة وداك طويل وداك قصير وشنو .. ياخي سطحيات لدرجة غريبة ..

ميادة قالت ليها انا ماقلت ليك يا سهام تاني ماتقطعي في الناس؟؟ ..

قالت ليها ياختي انا قدامن بقول الكلام ده ..ماخايفة منهن موش صاح هن كدا ؟؟ ولا انا بألف؟؟

قالت ليها حتى ولو ياسهام ..انتي لازم تنصحيهن قدامن ..وماتتكلمي ابدا عنهن غايبات .. كدا انتي بتكوني ذنبك اعظم منهن ..

سهام قالت ليها خلاص يامولانا الواعظ ..حاضر حاضر ..

قالت ليها يلا يلا ..عليك الله انا منتظراك توريني عوض بقول ليك شنو؟

المهم يازول سهام مشت تتلبد ..وتتاوق عشان تشوف ابوها في ولاطلع .. لقتو قاااعد والتلفون التوكيا الاحمر مختوت فوق الطربيزة قدامو.. هي دايراهو تشيل منو رقم عوض بس ..

مشت قالت لي امها يا امي انا دايرة رقم عمتي اسلم عليها .. ممكن تجيبي لي تلفون ابوي .. دايرة اشيل رقمها بدون ابوي مايعرف ..عشان مايقول البت دي بتتخافف مالا..

فهيمة قالت ليها بس خايفة من كلام ابوك .. ماخايفة مني انا ..

قالت يا امي انتي حبيبتي انتي الزيك منو؟ .. امشي بس جيبي لي التلفون وماتقولي ليهو لي سهام .. امها عاينت ليها كدا وتعابير وشها بتقول .. انا فاااااااهمة حنكك يا بت السر ..

اها مشت فهيمة.. قالت لي السر كدي ناولني تلفونك ده جاي .. عندي رقم كاسايالو .. قال ليها رقم منو بطلعو ليك براي .. قالت ليهو عليك الله جيب التلفون.. انا دايرة اكلو؟؟ .. يازول قصة سهام تتحصل على رقم عوض دي كانت برنامج في حد ذاتو ..

وكان في طريق مختصر ..تكلم ميادة تشيلو ليها من صلاح وبس .. غايتو جنس حالة ..

المهم في النهاية المراة شالت التلفون.. وودتو لي سهام سهام طلعت الرقم ولاول مرة في حياتها تتصل على عوض ..

عوض ذاتو شاف الرقم غريب .. فتح الخط وقال الووو..

قالت ليهو اهلين عوض كيفك؟

طبعا عوض ماعرف دي منو.. البتعرفو وبتتكلم معاهو بي نعومة كدا ..

قال ليها معليش انتي منو؟ ماعرفتك ..

قالت ليهو انا سهام بت خالك السر ياعوض ..

قال ليها اهلا اهلا ..والله الليلة دا اسعد يوم .. منو الفرش ليك موباتل بالورود..؟ وخلاك تتصلي ؟؟ حبابك والله ..

قالت ليهو اولا انا اتصلت عشان اشكرك لي موقفك معاي ..

وانك ماكلمت ابوي بانك يوم لاقيتني في السوق .. لانو ابوي كان ح يمنعني المدرسة ده كان ما قطع رقبتي ..

قال ليها وكت انتي بتخافي قدر كدي.. ليه بتكسري كلام ابوك ؟؟ وتطلعي من دون مايعرف؟؟ ..

قالت ليهو ياعوض انا بطلع لي خير ماعندي هدف شين ربنا بشهد علي .. لكن ابوي برضو واقف لي ومانعني ..

لكن ياعوض انا عايزة اسألك.. انت كذبت على ابوي ليه؟ ودسيت عليهو؟ .. وابيت تكلمو؟ .. مش كدا برضو عيب عليك تدس على خالك ؟

قال ليها طيب .. لانك انتي فهمك قاصر ..وما بتعرفي تفكري ذاتو .. انا اقول ليك ..

عشان انا اقول لي خالي كلام يزعلو ..ويعمل ليهو صدمة سكري ..لازم الكلام يكون فيهو خطورة اذا انا سكت عليهو ..

لكن انا عرفت انك انتي انسانة اصيلة ..ولايمكن تعملي غلط ..وطلعتك ديك كانت لي خير.. وما كذبتي علي في اي حاجة .. اذن مافي حاجة بتخليني افضحك ..واعمل مشكلة في حاجة ما بتستحق ..

بعدين .. شفت انو استرك واسكت مافيها ضرر .. بس ياريت يا سهام تراعي انو ابوك راجل عيان .. لو اتصدم يوم بانك انتي طلعتي .. قبل مايطلعك من المدرسة ..او يقطع رقبتك بتجيهو كومة سكري فاهمة ولالا ؟؟

قالت ليهو فاهمة ..حاضر ياعوض ..والله عشان كلامك.. انا تاني بس تحركاتي في حدود المدرسة ..

طبعا عوض متفاجئ ..كيف البت دي بتتكلم معاهو باسلوب راقي وكلامها كلو حلو وهين .. وزمان بتتماسخ معاهو .. ياربي البت دي الحصل ليها شنو؟

ايواا بكون كلموها قالو ليها محمد اخو عوض عايزك .. وعارفة انها حتجي تسكن معانا في البيت .. ماعايزة العلاقة بيني وبينها تكون متوترة .. غبية مغفلة.. ماعارفاني انا مابخت لي مرة في راسي .. انا الرجال البقولو انا انا ..مابشتغل بيهم ..اجي اعادي لي مراة ..

المهم عوض ماحس ابدا .. بالمشاعر الجديدة الحصلت على سهام .. وتفسيراتو كلها مشت بعيد .

ولو حس بي حاجة زي دي.. بالتاكيد ح يحسمها حسم لانها خلاص بقت من نصيب اخوهو.. وهو اتنازل بكامل قواهو العقلية من كل مايشعر به .. و خلاص سهام دي بقت بالنسبة ليهو بت خالو وبس ..

المهم الخط كدا قفل .. والامور بقت ماواضحة ..نعيش كتير نشوف كتير ..

الى اللقاء ..

رابط مختصر

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *


شروط التعليق :

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.