السحر القاتل – الحلقة 13

22 أكتوبر 2017آخر تحديث : منذ 3 سنوات
السحر القاتل – الحلقة 13
طارق اللبيب

عوض بعد استجمع نفسو شوية .. قال ليها يا امي انتي هسي محمد اخوي شاورتيهو؟ ولا بتتصرفي براك؟ .. قالت ليهو انا محمد عافية منو وراضية عليهو.. مابكسر لي كلمة .. كان قلت ليهو اقع في النار يقع .. انا ضربت ليهو في هجليج.. اول حاجة بعد ما استخرت ضربتلو هو .. وقلت ليهو انا دايرة اخطب ليك سهام بت خالك السر.. قال لي والله يا امي اي زولة تختاريها لي انتي انا بفرح بيها . وخاصة بت خالي .. ياريتها هي تقبل بي .. ناس مدني ديل بكونو شايفين روحهم .. وانا قلت ليهو مني البترفضك انت يامحمد ولدي .. اخوك ياعوض ماشاء الله هسع بنى بيتو في صالحة . وبقى جاهز للعرس .. ونحن ماعندنا اقرب من بت اخوي السمحة العاقلة ورزينة ..

عوض طبعا بقى ساكت متبوم .. وكل الفي راسو كملت .. وجواهو حصلت حاجة كدا.. تشبه القمرية الكانت بتغني وطارت ..

وبقى ماعندو حاجة يقولا .. هو اصلا لو قال لي امو. دايرها انا .. اول حاجة امو حـتقول ليهو كيف تعرس قبال اخوك؟ .. وحتقول ليهو انت هسع لا جاهز ولا عندك بيت ..

قالت ليهو اها رايك شنو؟ انت طبعا قعدت هناك.. اكتر زول فينا .. البت دي كيف .. ؟

قال ليها والله البت كويسة شديد .. وبتهتم بالناس .. وزولة كريمة.. وفيها شهامة ومحمد اخوي يستاهلا .. ان شاء الله بس تقبل بيهو .. قالت ليهو .. يعني انت مبارك الموضوع ؟

قال ليها طبعا يا امي .. والله دي احسن حاجة .. وانا ذاتي متمني لي متين محمد اخوي يتزوج .. لانه بعد كدي مهدد بالبورة .. قالت ليهو يبرا يا يايابا .. مالك عليهو .. وحات الله انا محمد ولدي لاهسي شايفاهو طفل ..

المهم عوض ماحسس امو ابدا.. بالشي الحاصل نهائيا” .. ومشى بي غادي لقى صلاح لسع صاحي .. قال ليهو .. مالك ياعوض مهجوم كدي وحيلك ميت .. مشيت كويس جيت تجرجر في كرعيك .. ووشك يلعن قفاك ..

قال ليهو لالا مافي اي شي .. محنة وتعدي يا عمك .. صلاح كان راقد وطاوي المخدة تحت راسو .. فام ترترب على حيلو .. وقاليهو محنة شنو؟ كفا الله الشر ..

قال ليهو تتخيل الموضوع طرشق؟.. موضوع سهام طار خلاص .. يا صلاح امي قالت وقالت وقالت ..

قال ليهو طيب انت ما كان توضح ليها الحقيقة .. وتوريها شعورك تجاه البت ..قال ليهو مهما كان شعوري مستحيل بعد كدي ابوح بيهو .. والله محمد اخوي كان داير روحي .. اسلها اديها ليهو .. خلي الامور على الله.. امي استخارت .. وانا متأكد انو مابحصل الا الخير .. لو الخير فيها لمحمد بتم .. ولو مافيها ليهو خير مابتم ..

صلاح قال ليهو والله صح ونعم بالله .. ودايما الخير فيما اختاره الله .. طيب نحن ننتظر ونشوف البحصل شنو؟

قال ليهو اقول ليك حاجة .. والله انا من امي قالت لي عايزها محمد اخوك.. التقول البت دي كانت راكة جواي وطارت .. فقدت الاحساس تجاها بطريقة غريبة خلاص.. احساسي تجاها بقى شكلو مختلف .. مختلف شديد ..

طبعا صلاح مامصدق كلام عوض .. شكلو زي الكانو داير يطمن صلاح ساي .. وما دايرو يشيل همو .. المهم صلاح حاسي بانو الزول ده متألم .. ده الحاصل هنا في الثورة ..

طيب في حاجات حاصلة في مدني .. النشوف الفي شنو ونجي راجعين .. شكلها القصة ماشة في اتجاه غريب شوية ..

بعد ما وصلت ميادة مدني مباشرة .. النهار يعني .. حصل اتصال بين ميادة وبين سهام .. واتكلمن كتير عن عوض ..

وميادة تشيل وتشكر في عوض .. عوض الكان سببب في علاجي .. عوض الوقف معانا .. عوض البطل مشاغلو وكل يوم يجينا من الثورة لي بحري .. عشان يشوف علاجي ماشي كيف .. انا عوض مابقدر اجازيهو .

وديك ساكتة تسمع ..

قالت ليها يا ميادة انا بسألك سؤال .. واقف لي ومحصحص لي في راسي .. صلاح سأل مني في المرسة ليه؟.. وسأل كمان عن اخلاقي وسلوكياتي .. يعني معقولة صلاح يمشي يسأل مني كدا براهو لله في الله ؟

انا الكلام ده ماخاشي راسي .. ده كلو كلام طالع من عوض بصراحة يا ميادة .. انا فكرت كتير في الموضوع ده .. ولقيت عوض ده لايمكن اتقبل بيهو.. لانو كان بتجسس علي فعلا.. وكان شاكي فيني .. والحكاية دي لايمكن تمر علي كدا مرور الكرام .. ايوة بحبني ماقلنا حاجة .. وبغير علي ماقلنا حاجة .. لكن اتخيلي زول شاكي فيك.. ومتابعك.. وبسأل منك الناس من اخلاقك وسلوكك ..

وبكرر ليك انا متأكدة انو حكى لصلاح.. قال ليهو انا شاكي في بت خالي .. وصلاح جاء يسأل مني بناء على طلبو .. دي مابتفوت علي انا ..

طيب يا ميادة.. انا كيف اتزوج زول ثقتو فيني اتهدت لي لحظة من اللحظات؟؟ وبقى متابعني بالشك والظن؟؟ كيف كيف وريني ؟؟ ..

قالت ليها لكن هو اول حاجة شافك في موقفين يا سهام .. خلنو متشكك .. يعني ده من حقو .. لانو في مقام ولي امرك من حقو يعرف الحاصل ..

قالت ليها مابعرف والله .. انا حاسة انو زول شكاك .. والزول ده لو قبلت بيهو .ح يقلب لي حياتي جحيم .. وكل مرة اتخيل انو متابعني وبراقبني ..

قالت ليها يازولة انا بقول عيدي التفكير في الموضوع ده ..

قالت ليها انا هسي الشي الهاميني اني ابريهو من التهمة وارجع علاقتو بي ابوي .. مادام امنت جانبو ..

وفعلا سهام مشت لي ابوها عايزة تتكلم معاهو ..

اها طبعا بعد ما مهدية اخت السر .. ام بارح المغرب كلمتو قالت ليهو تشاور لي سهام السر .. وهو ماشاورها .. وكل مايجي يتكلم معاها يغير رايو .. ماعارف ليه ..

المهم سهام جاتو براها .. قالت ليهو يا ابوي انا عايزة اتكلم معاك في موضوع ..انت عوض قبل مايمشي اتكلمت معاهو قلت ليهو شنو؟؟ .. قال ليها ياهو انا شتمتو قلت ليهو انت خاين وانت خنت ثقتي فيك .. وزفتو لاخر تزفيتة تخطر على بالك ..

قالت ليهو بس يا ابوي عوض ماخاين .. انا ماقلت ليك خاين .

قال ليها طيب قلتي لي شنو؟

انا سألتك قلت ليك انتي متضايقة منو ؟؟ .. قلتي لي نعم ..

قالت ليهو.. لكن مضايقتو لي ماكانت بالطريقة الانت فهمتها ..

الزول ده يا ابوي كان براقبني.. زي التقول هو ابوي.. لدرجة سأل مني في المدرسة .. وهل بطلع ولا لا .. واخلاقي في المدرسة كيف ؟ قال ليها لكن ياسهام ..غلطتي معاي غلط كبير خلاص والله ..

زول بتابعك زي اخوك .. وخايف عليك وبسأل منك ومهتم بيك .. كيف يعني تقولي لي مضايقني .. ؟؟ كيف ؟؟ كيف وريني ..

وهاج .. وبقى يقول لاحول ولاقوة الا بالله ..

قالت ليهو بس انت يا ابوي ماسألتني قلت لي مضايقك في شنو؟ ..

قال ليها بعديني ياسهام مستحيل زول يتابعك ويراقبك الا يشوف عليك حاجة تشككو .. الزول ده شاف عليك شنو؟

ممكن تكلميني ولا اضرب ليهو اسأله .. قالت ليهو لالا مافي اي حاجة اضرب اسأله ..

قال ليها كويس عمرو المدسدس في يوم يبان ياسهام .. وانالازم اعرف الحاصل شنو ..

اصبري ساي ….

وبقى يسوي يالطيف يالطيف .. هسع انا اضرب لي عوض اقولو شنو؟ .. واتكلم معاهو بي ياتو وشي؟ .. والله البتابعك انتي وامك.. اصلو ماتقوم ليهو قايمة ..

هسع عليك الله الولد ده يطن فيني شنو؟ .. ويقول علي شنو ..؟

والله وكت اتذكر كلامي ليهو.. وهو بقول لي .. على الاقل ياخالي اديني فرصة ادافع عن نفسي .. ياخال وريني الحاصل مني شنو؟؟ .. والله كل ما اتذكر الكلام ده.. الدنيا تبقى لي متل خرم الابرة ..

مافي مشكلة ياسهام ..دي غلطتي وانا بستحملا .. وطبعا ياجماعة نهائي ما سألها .. من رايها في محمد بس كان زعلان .. ويشيل ويشرب في الموية .

اصلا الزول بتاع السكري.. وكت يزعل بعطش عطش غريب .

المهم يازول.. هي طبعا بالرغم من انو ابوها زعل .. وهاج فيها .. لكن هي حست بي نفسها ارتاحت ..

لانو ياجماعة الظلم بخلي الانسان حاسي انو شايل ليهو جبل في قلبو .. وبكون متضايق لانه ظالم .. ودي طبعة في ناس معينين من انقياء الضماير .. ماكل الناس .. في ناس والله الواحد يظلمك لدرجة الأذى والعذاب . وما يحس بي مثقال ذرة في نفسو من العبء والندامة .. ناس دمها بقري ..

المهم طوالي دخلت اوضتها.. وشالت التلفون وضربت لي ميادة .. والكلام ده زي الساعة 11 ونص بالليل .. والكلام ده كلو في نفس اليوم الجو فيهو ناس ميادة من الخرطوم .. قالت ليها ياميادة .. وصلي خبر مني لي عوض.. انو انا برأت ساحتو .. وحكت ليها الحصل ..

ميادة قالت ليها سجمك العويرة ..ابوك فعلا ح يضرب لي عوض ويعتذر ليهو .. وحيضغطو بالكلام .. وعوض ح يفتك زي المافي شي .. لانو لابعرف يدس لابعرف يكضب .. قالت ليها اسمعي ياميادة ..انا ماخايفة خليهو يكلمو .. يعني الح يحصل شنو؟؟ ح يحموني المدرسة؟؟ خليهو ابوي يحميني.. يعني ح اموت مثلا؟؟ مافي مشكلة بقعد في البيت ..

قالت ليها يابت احسن ليك ذاتو تعرسي؟؟ والله عوض ده تاني مابتلقي زيو ماتضيعي فرصتك ..

قالت ليها عليك الله ماتسيبينا بلاعوض بلا علة .. ده هسي شوفيهو . دخلني في مشاكل لا ليها اول ولا ليها اخر .. حاجات كنت في غنى عنها .. انا اتخيلي عوض وسهام افترقو قبال يلتقو .. يارب تاني بكون في امل ؟؟ نششوف .؟

اها نرجع الثورة .. لي ناس عوض وصلاح قامو الصباح بدري .. وجهزو مستلزمات الرحلة .. وضربو لاصحابهم التلات .. وركبو من الثورة .. مشو طوالي على توتي ..

وكانت رحلة جميلة . وعوض مندمج مع البرنامج.. وصلاح يعاين ليهو بي طرف عينو .. ياربي الزول ده فعلا ما متأثر بي الموضوع بتاع سهام؟ ولا بمثل ساي .؟

قام قال ليهو ممكن يا عوض تقول لينا من الاشعار الانت حافظها .. قال ليهو ايوة حافظ من كلام الشيخ بس..

.. قال ليهو.. قول طيب نحن سامعين ..

قال ليهو.. الشيخ قال ..

الاقدار تجيك والحمة ديمة خفية .

رب الكون بدبر ونحن ليهو رعية .

الحاجه التحبها قد تكون لك اذية .

والقدر الكئيب قد يبقى نعمة هنيه.

. اضرب هم فؤادك بالفرح باكريه.

واتلقى المصايب فنجرةوسخـريه.

جفف دمعة الروح بي نعم محـرية

قلب الراسي سندالة ودموعو ضريه.

..

.صلاح قال ليهو ياسلااااااااام ياخي.. والله كلام يطمن الزول.. ويفتح ليهو باب امل.. مهما كان يأئس .. الامل في ربنا مابخيب والله ابشر والله ..

المهم الرحلة مستمرة .. والناس ديل ينكتو .. ويضحكو ومبتهجين ..

كررر تلفون عوض ضرب .. طلعو من جيبو .. وعاين ليهو لقا الاسم (خالي السر) يتصل بك..

والليلة والليله .. قلبو عمل هزاز عديل مع التلفون ههه

شال التلفون ومشى بعيد قال للجماعة عن اذنكم اتصال ضروري ..

وفتح الخط .. الو ..

السر قال ليهو .. عوض ؟

قال ليهو حبابك والله ياخال كيف صحتك واحوالك ؟؟

قال ليهو كيف حالك ياعوض .. انا يا عوض قبل ما اسلم عليك .انا متأسف شديد.. ياخي في كلامي القلتو ليك المرة الفاتت .. والله بس كنت فاهم غلط .. واناغلطت عليك.. وسمعتك كلام انت ما بتستاهلو ..

قال ليهو مافي مشكلة ياخال.. المهم انك عرفت مكانتك جواي وين.. عرضك عرضي بحافظ عليهو في حضورك وفي غيابك..

الحمد لله.. ..

مافي داعي تعتذر لي.. انت في مقام ابوي.. لو ضربتني انا مابرفع عيني عليك .. الخال شريك الوالد ياخال ..

قال ليهو طول عمرك اصـيل ياولدي ربنا يحفظك .. لكن يا عوض داير اسألك سؤال.. وتجاوبني بصراحة ..

انت السبب الخلاك تراقب البت دي شنو؟ وتتابعها ؟؟؟

الى اللقاء ..

رابط مختصر

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *


شروط التعليق :

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.